ഐക്യം സമാധാനം വിട്ടുവീഴ്ച ബലിയേക്കാൾ പ്രധാനം

prasant.palakkappillil@cmi.in 

to 

athazhath@gmail.com 

24 Aug 2023

അഭിവന്ദ്യ ആൻഡ്രൂസ് മെത്രാൻ അറിയുവാൻ, 

സമാധാനവും അഭിവാദ്യങ്ങളും!

പിതാവ് എന്ന് അഭിസംബോധന ചെയ്യുവാൻ മനസ്സ് സമ്മതിക്കാത്തതുകൊണ്ടാണ് ഇപ്രകാരം ചെയ്യുന്നത്. 

അങ്ങുൾപ്പെടുന്ന സീറോ മലബാർ സഭാഅംഗങ്ങളുടെ സംഘം എടുത്തിരിക്കുന്ന തീരുമാനം കേവലം 'archeological or  museological' ആണെന്ന് ശക്‌തമായി വിശ്വസിക്കുമ്പോഴും, ആ തീരുമാനത്തിന് വഴങ്ങണം എന്ന് ഞാൻ പറയുന്നു.  കാരണം അതിൽ വാശി പിടിക്കാൻ മാത്രം  വിശ്വാസത്തിൻറെയും  നൈതികതയുടെയും കാര്യങ്ങൾ ഒന്നും തന്നെ ഞാൻ കാണുന്നില്ല. 

പക്ഷെ അങ്ങയുടെ ഭാഗത്തു അപ്രകാരമുള്ള ഒരു ശാഠ്യത്തിൽ ഒരു അക്രൈസ്‌തവ ritualism ഞാൻ കാണുന്നു. 

നാം സഭൈക്യത്തിനായി പ്രാർത്ഥിക്കുകയും, വിവിധ ക്രൈസ്തവ സഭകൾ (ഇതര മതങ്ങളും) എപ്രകാരം ഒരുമിച്ച് വരാം എന്ന് ചിന്തിക്കുകയും അതിനായി പരിശ്രമിക്കുകയും ചെയ്യുന്ന (? ചെയ്യേണ്ടുന്ന) ഒരു കാലത്തിൽ അങ്ങയുടെ ക്രൈസ്തവ നേതൃത്വം, 'ആത്മാവിലും സത്യത്തിലും ആരാധിക്കുന്ന സമയം' അറിയിച്ച ക്രിസ്തുവിന്റെ സ്നേഹത്തിന്റെയും ത്യാഗത്തിൻറെയും  അടയാളത്തെ കേവലം ഒരു ആചാരണാനുഷ്ഠാനത്തിൻറെ  കുരുക്കിൽ കുടുക്കിയില്ലേ? 

വഴക്കിൻറെയും ദുരഭിമാനത്തിൻറെയും ഒരു മാർഗ്ഗ(means)മാക്കി  മാറ്റിയില്ലേ? 

എന്ത് തരം  വിരോധാഭാസമാണിത് എന്ന് അങ്ങയെപ്പോലെ ഒരു പണ്ഡിതനെ ഞാൻ പറഞ്ഞു മനസ്സിലാക്കേണ്ടതില്ലല്ലോ? 

ഇത്രയും ജനങ്ങൾ ദിവസം തോറുമുള്ള ബലിയർപ്പണത്തിലും, കൂട്ടായ്മായിലും പങ്കു ചേരാതിരിക്കുന്നതിലും പ്രധാനം  അനുഷ്ഠാനം തെറ്റാതിരിക്കുന്നതാണ് എന്നത് ഏത് ക്രൈസ്തവ ആധ്യാത്മികതയാവും, അതിന്  ഏത്  ദൈവശാസ്ത്ര ന്യായീകരണം നൽകിയാൽ മതിയാകും എന്നത് എന്നെ ചിന്തിപ്പിക്കുന്നു. 

അങ്ങയുടെ ഈ തീരുമാനങ്ങളും നേതൃത്വവും ക്രിസ്തു മാർഗ്ഗം എത്ര കണ്ട് വളർത്തി, അങ്ങയുടെ മുൻകൈയിൽ തുരത്തിയോടിക്കപ്പെട്ട, കരിയിൽ മെത്രാന് ചെയ്യാനാവാത്ത എന്ത് കാര്യം ഈ ഒരു വർഷത്തിൽ അങ്ങ് നേടി എന്ന് സ്വയം പരിശോധിച്ച്, അതേ  മാനദണ്ഡമനുസരിച്ച് അങ്ങും ഈ ഇടം വിട്ട് പോകണം എന്നാണ് എൻറെ  അഭ്യർത്ഥന. 

പാപികളോട് കരുണ കാണിച്ച, തള്ളി പറഞ്ഞ പത്രോസിനെ തന്റെ ശിഷ്യരുടെ തലവനാക്കിയ,  ഈശോയുടെ സഭയാണ് ഒരു അനുഷ്‌ഠാനത്തിന്റെ പേരിൽ വൈദികരെയും ഇതര വിശ്വാസികളെയും സഭക്ക് പുറത്താക്കുമെന്ന് ഭീഷണിപെടുത്തുന്നത്. 

എത്ര വികലമായ ഒരു ക്രിസ്തീയതയാണിത് ? 

വ്യഭിചാരവും, ഭ്രൂണഹത്യയും, കൊലപാതകവും ചെയ്യുന്നവരെപ്പോലും പൊറുക്കുന്ന സഭ കേവലം ഒരു അനുഷ്ഠാനത്തിൻറെ വ്യഗ്രതയിൽ സ്വയം ഭിന്നിക്കാൻ അനുവദിക്കുമെന്നോ? 

അങ്ങയുടെ നേതൃത്വം കേരളത്തിലെ ചില രാഷ്ട്രീയക്കാരുടെയും ഈയിടെ കുപ്രസിദ്ധിയാര്ജിച്ച ചില വൻ ചലച്ചിത്ര താരങ്ങളുടെയും ശ്രേണിയിൽ പെടുന്നതായാണ് തോന്നുന്നത്. ഇതിൽ ക്രിസ്തു സ്നേഹത്തിന്റെ ഒരു നന്മ കാണുന്നില്ല - അവിടുന്നു വാഗ്ദാനം ചെയ്ത സത്യത്തിൻറെ  സ്വന്തന്ത്ര്യം കാണുന്നില്ല.  മറിച്ച് ചാണക്യാചാര്യൻറെ  ദാമ, ദണ്ഡ, ഭേദ നീതി കാണുന്നു. 

പ്രകടമായി കാണപ്പെടുന്നത് പാരമ്പര്യവാദം, അധികാരദുഷ്പ്രഭുത്വം, അനുഷ്ഠാനവാദം, പ്രീശത്വം, വിഭാഗീയ തന്ത്രം, നാർസിസ്സിസം എന്നിവ. 

വിശുദ്ധ ബലിയർപ്പണത്തിന് ഒരാൾ വന്നാൽ വലിയ കാര്യം എന്ന് ചിന്തിക്കുന്ന അനേകം പള്ളികൾ ഇന്ത്യയിലും വിദേശത്തും (വിദേശത്ത് അങ്ങു വേണ്ടുവോളം  കണ്ടിരിക്കും എന്നറിയാം) കണ്ടിരിക്കുമ്പോൾ, നൂറു കണക്കിന് വിശ്വാസികൾക്ക് ബലിയർപ്പണം നിഷേധിക്കുന്നത് റോമൻ കാനൻ കത്തോലികമാകുമെങ്കിലും, എപ്രകാരം ക്രൈസ്തവമാകും എന്ന് ബലമായി ശങ്കിക്കുന്നു. 

ഇത്രയും വിഷമങ്ങൾ എഴുതുമ്പോളും ഒരു അക്രൈസ്തവ കാലുഷ്യം ഉള്ളിൽ നിൽക്കുമ്പോഴും, എല്ലാ ദിവസവും അങ്ങയെ ബലിവേദിയിൽ അനുസ്മരിക്കുകയും, അങ്ങയുടെയും അങ്ങയുടെ സിൽബ ന്ധികളുടെയും  നേതൃത്വത്തിൽ ആണെങ്കിൽ പോലും സഭയിൽ ഐക്യം ഉണ്ടാകാനും, ദുർമാതൃക ഇല്ലാതിരിക്കുവാനും പ്രാർത്ഥിക്കുകയും  ചെയ്യൂന്നു. 

വിധേയൻ 

പ്രശാന്ത് പാലക്കാപ്പിള്ളിൽ സിഎംഐ